عبد الرحيم التويتي ريف الشعر

يا طير يامجروح أن تشتـي تـروح
والعاصفة هوجاء على كل السفـوح
كمن طموح يا طير في وكره ينـوح
يشتي يطير والجو بالعاصف كضيـم
لاشتيك تطير ناسبت لك نائب وزيـر
وارم المؤهل والكفـاءه وسـط بيـر
واشرب وشرب للسكرتير والمديـر
لكن شراب مخصوص مش عنبه وليم
اذا ضميـرك حـي شـوري موتـه
واقتل أبوه وأمـه وخالـه وأخوتـه
تحصل علـى فلـه ورتبـه ملفتـه
للانتبـاه وأربـع تكاسـي للحريـم
احذر تقول الصدق واسمع ما أقـول
اكذب إذا بدك تقـع فحـل الفحـول
ارقص على دقـات دقـات الطبـول
وامشي مع من دامـوا الدنيـا دويـم
أهل الوساطة ساكنين سطـح القمـر
وأهل الكفاءة والأدب صبـل البقـر
اشعر لك اشعر دق راسك بالحجـر
محدّ بداوي شعر وافهـم يـا حليـم
تحمد الله يـا أخـي عنـدك عملـي
ضمن لك الصلصه مع حق البصـل
على الأقل أحسن من الجالس عطـل
درّس ولو قالو تـوزع فـي تريـم
بل واشكر الله يا أخي عندك معـاش
عبد الرحيم يشعـر لدولتنـا بـلاش
وكافوه فـي نهـب بيتـه والفـراش
بدون ادانه في سجـون سيـن جيـم
لاشتيـك ترقـى أو تقـود المنطقـة
درس ولكن فـي فصـول الزندقـه
نافق لكـي تسلـم حبـال المشنقـه
فالصـدق مفقـود الحمايـد كاليتيـم
ايضاً وكن عصري معاصر وعتصر
وقت الغداء حـده وبالقيلـه عَصِـر
تلقى وسيطك باب شيرتـون منتظـر
وسط الغمارى كاشفه نصف الفريـم
على حسـب قـدر الهديـة ترقيـه
أمـا إذا كانـت هـديـه مغـريـه
ينزل قرارك فـي جريـده رسميـه
واحـذر تصلـي بعدهـا أو تستقيـم
إلا إذا ودفـت صـل بالبنطـلـو ن
والمشط والكالون معجـون السنـون
في جيبك الأيمن وحـاذر ان تكـون
في صف واضي فالوضوء دينه قديم
وبعد شهرين المطـار فـي خدمتـك
في طائرة هليـود يحجـز رحلتـك
والخارجيـة كلهـا فـي شنطـتـك
في خانـة الـوان الاناقـه والكِريـم
واحذر تقول أن الحضارة من سبـاء
كي لا يدينـوك بالتخلـف والغبـاء
على الأقل كـن فـي ديانـا معجبـا
تمنح شهـادة منفتـح راقـي عظيـم
مثل بـلادك بالملاهـي والرقيـص
كي لا يقولوا شعبنا جالـس طسيـس
صور لهم بلقيس في نصف القميص
تظهر وسيمه وأنت متحضـر وسيـم
تأمركـي يابنـت يعـرب تكتـكـي
مـادام رجالـش تميكـل مونـكـي
كوني كمونيكـا كلينتـون واتركـي
مكه وحجي لـش بدلهـا اورشليـم
مالش ومال المؤمنيـن والمؤمنـات
هـذا زمـان المدمنيـن والمدمنـات
تمـدنـي فالـحـظ للمتـمـدنـات
كي تصلحي زوجة لقنصلنـا المقيـم
وحضـري للجامـعـة بالقـاهـرة
كي ترجعي دعجى سمينـه سافـره
للناجحات مليـون وضيفـه شاغـرة
والناجحين قـال الوزيـر الله كريـم
وسمي امش طنط واختش مزمزيـن
وجدتـش تيتـه وبالـذوق الرزيـن
تبـارزي للـبـارزات والبـارزيـن
في حلبة المسرح مـع عبـد الحليـم
تخروطي لش بالمكاتـب واخرطـي
وان قال زوجش اين كنتـي عيطـي
عياط مصري واستفزيـه وانخطـي
نخيط صنعانـي وقولـي لـه لئيـم
سبـي ابـوه بالانجليـزي وارطنـي
دونكي فكن قم صب قهوه واعطنـي
واطبـخ وكنـس ماعجبـك طلقتنـي
فالجامعـيـه ماتكـنـس ياغشـيـم
تحـرري يابنـت اروى واظهـري
في نصف كمش او ببدلـة عسكـري
وبوتري فمـش وسيـري طوبـري
وبطري صـدرش بحاجـه للنسيـم
تمصرنـي تنـصـري تمسيـسـي
تبيرسـي تحـت الركـب لاتلبسـي
وبدلـي شكراًبمرسـي واطمـسـي
من سورة التحريـم احكـام الحكيـم
ومـارسـي يافطمتـنـا مـارسـي
حقش ومن حقش تسوقي وادعسـي
محد مخاطب تطمسي مـا تطمسـي
قولي انا حره وما احـد بـي لزيـم
لاتنجبـي تبـزي ولا تتعـجـوزي
تمزمزي مزي لحقـوش واحجـزي
تميرضي بالصبـح وباليـل اقفـزي
قالو سليـم العقـل بالجسـم السليـم
وشاهدي بالـدش فلمـش واشتـري
مثله مـع عبـده سعيـد المقطـري
لوتبصريـه ياساميـه لاتعـصـري
زوجش وسعه مرتين في كأس ليـم
ونافـسـي بالقـيـاده واطـبـعـي
صـورة دعاياتـش وشلـي مدفعـي
الجنبيـه لـش والعسيـب اتبرعـي
والبيت لش وانـا لحبلـي والشريـم
وابكي علـيَّ ياعروبـه واضحكـي
يابنـت صهيـون الذكيـه تكتـكـي
امة محمـد واحصريهـم واسفكـي
دم الذي باقي علـى الديـن القويـم